Ahmad Nadeem Qasmi
meri mahdud basarat ka natija nikla
asman mere tasavvur se bhi halka nikla
roz-e-avval se hai fitrat ka raqib adam-zad
dhuup nikli to mire jism se saaya nikla
sar-e-dariya tha charaghan ki ajal raqs men thi
bulbula jab koi tuuta to sharara nikla
baat jab thi ki sar-e-sham farozan hota
raat jab khatm hui subh ka taara nikla
muddaton baad jo roya huun to ye sochta huun
aaj to sina-e-sahra se bhi dariya nikla
kuchh na tha kuchh bhi na tha jab mire asar khude
ek dil tha so kai jagah se tuuta nikla
log shahpara-e-yak-jai jise samjhe the
apni khalvat se jo nikla to bikharta nikla
mera isar mire zoam men be-ajr na tha
aur main apni adalat men bhi jhuta nikla
main to samjha tha bahut sard hai zahid ka mizaj
us ke andar to qayamat ka tamasha nikla
vahi be-ant khala hai vahi be-samt safar
mera ghar mere liye alam-e-bala nikla
zindagi ret ke zarrat ki ginti thi ‘nadim’
kya sitam hai ki adam bhi vahi sahra nikla
Leave a Reply