Ahmad Nadeem Qasmi
main vo shaer huun jo shahon ka sana-khvan na hua
ye hai vo jurm jo mujh se kisi unvan na hua
is gunah par miri ik umr andhere men kati
mujh se is maut ke mele men charaghan na hua
kal jahan phuul khile jashn hai zakhmon ka vahan
dil vo gulshan hai ujad kar bhi jo viran na hua
ankhen kuchh aur dikhati hain magar zehn kuchh aur
baagh mahke magar ehsas-e-baharan na hua
yuun to har daur men girte rahe insan ke nirkh
in ghulamon men koi yusuf-e-kanan na hua
main khud asuda huun kam-kosh huun ya pathar huun
zakhm kha ke bhi mujhe dard ka irfan na hua
saari duniya mutalatim nazar aati hai ‘nadim’
mujh pe ik tanz hua rauzan-e-zindan na hua
Leave a Reply