Ameeta Parsuram Meeta
subh-e-raushan ko andheron se bhari shaam na de
dil ke rishte ko miri jaan koi naam na de
mod aate hi mujhe chhod ke jaane vaale
phir se tanhaiyan be-chainiyan kohram na de
mujh ko mat bandh vafadari ki zanjiron men
main ki badal huun bhatak jaane ka ilzam na de
mutmain donon hain main aur meri tarz-e-hayat
tishnagi mere muafiq hai koi jaam na de
asman dene ka ai dost dikhava mat kar
mujh ko udne ki ijazat tu tah-e-dam na de
haan nibhae hain mohabbat ke faraez main ne
mustahiq bhi huun magar koi bhi inaam na de
dil ke afsane ka aghaz hasin hai ‘mita’
silsila yunhi chale koi bhi anjam na de
Leave a Reply