Ek Kahani

Ambarin Salahuddin

mere kamre men phaili hai ek kahani

abhi zara si der hui hai

main ne ik maile kaghaz par

harfon ke tukde jode the

aur kahani ko thodi si jagah mili thi

phir lafzon ke taane baane bikhar gae the

jin lafzon se ankh-micholi khelte khelte

biit gaya hai itna vaqt

ki ab to yaad bhi kab aata hai

apne jism ki qaid men hain ham ya bahar hain

itna vaqt ki manzar saare pighal gae hain

ojhal hain tasvir ke rang men ya zahir hain

aur kahani kaghaz se bah nikli hai

saare kamre men phaili hai

sab darvazon aur darichon se lipti hai

saari kitaben aundhi kar ke

un se vo sab lafz nikal ke le aai hai

jo ham ne ik saath padhe the

meri almari se band lifafe khol ke

saare khvab utha laai hai

jo ham ne ik saath bune the

aur zamin se chhat tak kaise bechaini se bhatak rahi hai

thak jaati hai aur miri ankhon se bahne lag jaati hai

bistar ke niche chhup kar aahen bharti hai

mere kandhe par sar rakh ke so jaati hai

aur kabhi khidki ke pat par matha tek ke kho jaati hai

mere kamre men phaili ye ek kahani

ghaat men hai ab

koi rauzan-e-dar darvaza khul jaae to

ye is habs-zada kamre se bahar nikle

jaise mere dil ki ek ik rag ko chiir ke bah nikli thi