Shahryar
khadi raho
isi jagah isi tarah khadi raho
safed barf ki chatan qatra qatra gal rahi hai
galne do
siyah aur tavil raat dhire dhare dhal rahi hai
dhalne do
miri nigah ke hisar men yunhi khadi raho
main tum se aur duur ho raha huun mujh se mat daro
in ungliyon pe os ke nishan the jo mit gae
labon pe ek ajnabi ka naam tha jo bujh gaya
hiran ki aankh khauf ki chamak se bhi tahi hui
darinde jangalon ko chhod kar kahin chale gae
khadi raho
isi jagah isi tarah khadi raho
Leave a Reply