Sahir Ludhianvi
rang aur nuur ki barat kise pesh karun
ye muradon ki hasin raat kise pesh karun
main ne jazbat nibhae hain usulon ki jagah
apne arman piro laaya huun phulon ki jagah
tere sehre ki ye saughat kise pesh karun
ye mere sher mire akhiri nazrane hain
main un apnon men huun jo aaj se begane hain
be-taalluq si mulaqat kise pesh karun
surkh jode ki tab-o-tab mubarak ho tujhe
teri ankhon ka naya khvab mubarak ho tujhe
main ye khvahish ye khayalat kise pesh karun
kaun kahta hai ki chahat pe sabhi ka haq hai
tu jise chahe tira pyaar usi ka haq hai
mujh se kah de main tira haat kise pesh karun
Leave a Reply