Rahat Indori
jab kabhi phulon ne khushbu ki tijarat ki hai
patti patti ne havaon se shikayat ki hai
yuun laga jaise koi itr faza men ghul jaae
jab kisi bachche ne quran ki tilavat ki hai
ja-namazon ki tarah nuur men ujlai sahar
raat bhar jaise farishton ne ibadat ki hai
sar uthae thiin bahut surkh hava men phir bhi
ham ne palkon ke charaghon ki hifazat ki hai
mujhe tufan-e-havadis se darane vaalo
hadson ne to mire haath pe baiat ki hai
aaj ik dana-e-gandum ke bhi haqdar nahin
ham ne sadiyon inhin kheton pe hukumat ki hai
ye zaruri tha ki ham dekhte qilon ke jalal
umr bhar ham ne mazaron ki ziyarat ki hai
Leave a Reply