Apni Hi Sada Sunun Kahan Tak

Parveen Shakir

apni hi sada sunun kahan tak

jangal ki hava rahun kahan tak

har baar hava na hogi dar par

har baar magar uthun kahan tak

dam ghatta hai ghar men habs vo hai

khushbu ke liye rukun kahan tak

phir aa ke havaen khol dengi

zakhm apne rafu karun kahan tak

sahil pe samundaron se bach kar

main naam tira likhun kahan tak

tanhai ka ek ek lamha

hangamon se qarz luun kahan tak

gar lams nahin to lafz hi bhej

main tujh se juda rahun kahan tak

sukh se bhi to dosti kabhi ho

dukh se hi gale milun kahan tak

mansub ho har kiran kisi se

apne hi liye jalun kahan tak

anchal mire bhar ke phat rahe hain

phuul us ke liye chunun kahan tak