Obaidullah Aleem
azaab aae the aise ki phir na ghar se gae
vo zinda log mire ghar ke jaise mar se gae
hazar tarah ke sadme uthane vaale log
na jaane kya hua ik aan men bikhar se gae
bichhadne valon ka dukh ho to soch lena yahi
ki ik nava-e-pareshan the rahguzar se gae
hazar raah chale phir vo rahguzar aai
ki ik safar men rahe aur har safar se gae
kabhi vo jism hua aur kabhi vo ruuh tamam
usi ke khvab the ankhon men ham jidhar se gae
ye haal ho gaya akhir tiri mohabbat men
ki chahte hain tujhe aur tiri khabar se gae
mira hi rang the to kyuun na bas rahe mujh men
mira hi khvab the to kyuun miri nazar se gae
jo zakhm zakhm-e-zaban bhi hai aur numu bhi hai
to phir ye vahm hai kaisa ki ham hunar se gae
Leave a Reply