Jaun Eliya
dil-e-barbad ko abad kiya hai main ne
aaj muddat men tumhen yaad kiya hai main ne
zauq-e-parvaz-e-tab-o-tab ata farma kar
said ko laiq-e-sayyad kiya hai main ne
talkhi-e-daur-e-guzishta ka tasavvur kar ke
dil ko phir mail-e-fariyad kiya hai main ne
aaj is soz-e-tasavvur ki khushi men ai dost
tair-e-sabr ko azad kiya hai main ne
ho ke israr-e-gham-e-taza se majbur-e-fughan
chashm ko ashk-e-tar imdad kiya hai main ne
tum jise kahte the hangama-pasandi meri
phir vahi tarz-e-gham ijad kiya hai main ne
phir gavara hai mujhe ishq ki har ik mushkil
taaza phir sheva-e-farhad kiya hai main ne
Leave a Reply