Dagh Dehlvi
jab vo but ham-kalam hota hai
dil o diin ka payam hota hai
un se hota hai samna jis din
duur hi se salam hota hai
dil ko rokun ki chashm-e-giryan ko
ek hi khuub kaam hota hai
aap hain aur majma-e-aghyar
roz darbar-e-am hota hai
ziist se tang hain na chhed hamen
dekh ghussa haram hota hai
liije muusa se lan-tarani ki
ab to ham se kalam hota hai
‘dagh’ ka naam sun ke vo bole
aadmi ka ye naam hota hai
Leave a Reply