Dagh Dehlvi
darte hain chashm o zulf o nigah o ada se ham
har dam panah mangte hain har bala se ham
mashuq ja-e-hur mile mai bajae aab
mahshar men do saval karenge khuda se ham
gar tu kisi bahane aa jaae vaqt-e-nazaa
zalim karen hazar bahane qaza se ham
go hal-e-dil chhupate hain par is ko kya karen
aate hain khud-ba-khud nazar ik mubtila se ham
na-char ikhtiyar kiya sheva-e-raqib
kuchh be-hayai khuub hain guzre haya se ham
mangi na hogi khizr ne yuun umr-e-javedan
kya apni maut mangte hain iltija se ham
dekhen to pahle kaun mite us ki raah men
baithe hain shart bandh ke har naqsh-e-pa se ham
majbur apni sheva-e-sharm-o-haya se tum
na-char iztirab-e-dil-e-mubtala se ham
ye aarzu hai aankh men surma lagaenge
ai ‘dagh’ khak-e-pa-e-rasul-e-khuda se ham
Leave a Reply