Aamir Suhail
siskiyon hichkiyon aahon ki faravani men
uljhanen kitni hain is ishq ki asani men
ye tire balon ka talab ki tah ko chhuna
halat-e-khvab men ya alam-e-uryani men
be-hijabana kisi lahr ka tujh tak aana
phir tire jism ka bah jaana ghane paani men
kahkashaon ka ghazalon ka ghazal-zadon ka
dur-o-nazdik se aana tiri mehmani men
raat ka jhukna tiri pusht pe dildari ko
baagh ke pedon ka aa jaana rajaz-khvani men
bam-o-dar dekhte jaate hain khade sakte men
ik sitare ka tavarud tiri peshani men
marmarin ungliyan ik dil pe likhen hal-e-hina
phuul avaz ka khil jaae pashemani men
chand makhruti ubharon pe shuaen phenke
is qadar mahv tujhe dekh ke hairani men
saya-e-sabit-o-sayyar ke haale men chalun
aur jahanon men rahun teri nigahbani men
Leave a Reply