Aabid Adeeb
safar ka shauq na manzil ki justuju baaqi
musafiron ke badan men nahin lahu baaqi
tamam raat havaon ka gasht jaari tha
savere tak na raha koi hu-ba-hu baaqi
sabhi tarah se taaruf to ho gaya un ka
rahi hai ab to mulaqat ru-ba-ru baaqi
jo bhiid bikhre to dekhun talab ye kaisi hai
dayar-e-ghair men hai kis ki justuju baaqi
vahi nazare vahi garmi-e-sukhan hai magar
na hi vo baat na vo tarz-e-guftugu baaqi
zamana mujh se juda ho gaya zamana hua
raha hai ab to bichhadne ko mujh se tu baaqi
usi lihaz ka ‘abid’ malal hai ham ko
raha na aaj jo dauran-e-guftugu baaqi
Leave a Reply