Aabid Adeeb
ye mere shahr ka ik aur hadisa hoga
vo kal yahan mira mehman ban chuka hoga
talash men huun kisi ki main kab se sargardan
usi tarah koi mujh ko bhi dhundhta hoga
miri tarah se koi chikhta hai rahon men
miri tarah koi duniya ko dekhta hoga
laga ke aaega chehra koi naya shab men
vo jis ko baith ke din men tarashta hoga
shanasa chehre bhi lagne lage hain begane
ab apna vaqt hi shayad badal raha hoga
udaas udaas sa khoya hua sa rahta hai
kuchh us se bhi koi kah kar badal gaya hoga
thaka thaka sa usi dar pe aa ke baitha tha
na puchha hoga kisi ne to chal diya hoga
jahan pahunch ke qadam dagmagae hain sab ke
usi maqam se ab apna rasta hoga
Leave a Reply