Bahadur Shah Zafar
galiyan tankhvah thahri hai agar bat jaegi
ashiqon ke ghar mithai lab shakar bat jaegi
ru-ba-ru gar hoga yusuf aur tu aa jaega
us ki janib se zulekha ki nazar bat jaegi
rahzanon men naz-o-ghamza ki ye jins-e-din-o-dil
juun mata-e-burda akhir ham-digar bat jaegi
hoga kya gar bol utthe ghair baton men miri
phir tabiat meri ai bedad gar bat jaegi
daulat-e-duniya nahin jaane ki hargiz tere saath
baad tere sab yahin ai be-khabar bat jaegi
kar le ai dil jaan ko bhi ranj-o-gham men tu sharik
ye jo mehnat tujh pe hai kuchh kuchh magar bat jaegi
muung chhati pe jo dalte hain kisi ki dekhna
jutiyon men daal un ki ai ‘zafar’ bat jaegi
Leave a Reply