Saqi Ho Aur Chaman Ho Mina Ho Aur Hum Hon

Poet

saaqi ho aur chaman ho miina ho aur ham hon

baran ho aur hava ho sabza ho aur ham hon

zahid ho aur taqva aabid ho aur musalla

maala ho aur barahman sahba ho aur ham hon

majnun hain ham hamen to is shahr se hai vahshat

shahri hon aur basti sahra ho aur ham hon

ya-rab koi mukhalif hove na gird mere

khalvat ho aur shab ho pyara ho aur ham hon

divangi ka ham ko kya haz ho har taraf gar

ladke hon aur phathre balva ho aur ham hon

auron ko aish-o-ishrat ai charkh-e-be-muravvat

ghussa ho aur gham ho rona ho aur ham hon

iman o diin se ‘taban’ kuchh kaam nahin hai ham ko

saaqi ho aur mai ho duniya ho aur ham hon