Hijr Gham Ka Bayan Hai Goya

Poet

hijr gham ka bayan hai goya

yaas ki dastan hai goya

us ke jaur-o-sitam ka kya kahna

zulm men asman hai goya

paanv phailae khuub sote hain

kunj-e-marqad makan hai goya

rukh se zahir hai hal-e-dard-e-firaq

qalb ka tarjuman hai goya

khal-e-ariz pe yuun numayan hai

daagh dil ka nishan hai goya

hijr men aah us gul-e-tar ke

rang-e-rukh zaafran hai goya

dard-e-dil kyuun kahen na ham un se

jab hamari zaban hai goya

arsh se amad-e-mazamin hai

ye zamin asman hai goya

‘barq’ tum ne ghazal ye khuub kahi

lucknow ki zaban hai goya