Poet
dam na nikla yaar ki na-mehrbani dekh kar
sakht hairan huun main apni sakht-jani dekh kar
shaam se ta-subh-e-furqat subh se ta-sham-e-hijr
ham chale kya kya na lutf-e-zindagani dekh kar
yuun to lakhon gham-zada honge magar ai asman
jab tujhe janun ki la de mera saani dekh kar
ab tap-e-furqat se ye kuchh zof taari hai ki aah
dang rah jaati hai ham ko na-tavani dekh kar
vaste jis ke hue bahr-e-fana ke ashna
vo pasija bhi na apni jan-fishani dekh kar
baaz aa ‘bimar’ us ke ishq se jaane bhi de
taras aata hai ye teri naujavani dekh kar
Leave a Reply