Ishq Ki Mere Jo Shohrat Ho Gai

Poet

ishq ki mere jo shohrat ho gai

yaar se mujh ko nadamat ho gai

khaak arz-e-muddaa us se karun

jis ko baton men kudurat ho gai

yaan se jaane ko hain vo achuk kahin

kya bala ai abr-e-rahmat ho gai

ab sitam aghyar par karne lage

mere mar jaane se ibrat ho gai

jalva-e-maani nazar aane laga

piite piite mai ye surat ho gai

un ki baten us ne bhi chhup kar sunin

aaj naseh ko nasihat ho gai

mana-e-vasl-e-ghair par hans kar kaha

baare ab tum ko bhi ghairat ho gai

bu-e-gul us gul ki bu ke ru-ba-ru

fil-haqiqat be-haqiqat ho gai

bas na farmate phiro ye ‘shefta’

go unhen tum se mohabbat ho gai