Riyaz Khairabadi
jo pilae vo rahe yarab mai-o-saghar se khush
khush rahe pir-e-mughan jaate hain us ke dar se khush
sang-e-khun-aluda ko samjhe hain ye gulshan ka phuul
tod kar sar tere divane hain kya patthar se khush
us gali ke rahne vaale bhi maze ke log hain
fitna-e-mahshar se khush hangama-e-mahshar se khush
yuun gale se kyuun lagata sakht-janon ko koi
ham gale mil kar hue kya kya tire khanjar se khush
khum ke khum bhar bhar ke jaaen kam na ho mai bund-bar
zahid-o-ham hain tumhare chashma-e-kausar se khush
khuun paani ek mera ho gaya un ke liye
apne zakhm-e-dil se khush hon apne chashm-e-tar se khush
dil men ghar karti hai vo kafir mizha kafir nigah
main tire paikan se khush huun main tire nashtar se khush
khana bagh-e-ghair men the ya khule maidan men
vo kahin se aae hon aae hain kuchh bahar se khush
mai-kade men aa ke piite hain pilate hain ‘riyaz’
kah rahi hai vaza un ki hain ye apne ghar se khush
Leave a Reply