Himala

Allama Iqbal

ai himala ai fasil-e-kishvar-e-hindustan

chumta hai teri peshani ko jhuk kar asman

tujh men kuchh paida nahin derina rozi ke nishan

tu javan hai gardish-e-sham-o-sahar ke darmiyan

ek jalva tha kalim-e-tur-e-sina ke liye

tu tajalli hai sarapa chashm-e-bina ke liye

imtihan-e-dida-e-zahir men kohistan hai tu

pasban apna hai tu divar-e-hindustan hai tu

matla-e-avval falak jis ka ho vo divan hai tu

su-e-khalvat-gah-e-dil daman-kash-e-insan hai tu

barf ne bandhi hai dastar-e-fazilat tere sar

khanda-zan hai jo kulah-e-mehr-e-alam-tab par

teri umr-e-rafta ki ik aan hai ahd-e-kuhan

vadiyon men hain tiri kaali ghataen khema-zan

chotiyan teri surayya se hain sargarm-e-sukhan

tu zamin par aur pahna-e-falak tera vatan

chashma-e-daman tira aina-e-sayyal hai

daman-e-mauj-e-hava jis ke liye rumal hai

abr ke hathon men rahvar-e-hava ke vaste

taziyana de diya barq-e-sar-e-kohsar ne

ai himala koi bazi-gah hai tu bhi jise

dast-e-qudrat ne banaya hai anasir ke liye

haae kya fart-e-tarab men jhumta jaata hai abr

fil-e-be-zanjir ki surat uda jaata hai abr

jumbish-e-mauj-e-nasim-e-subh gahvara bani

jhumti hai nashsha-e-hasti men har gul ki kali

yuun zaban-e-barg se goya hai us ki khamushi

dast-e-gul-chin ki jhatak main ne nahin dekhi kabhi

kah rahi hai meri khamoshi hi afsana mira

kunj-e-khalvat khana-e-qudrat hai kashana mira

aati hai naddi faraz-e-koh se gaati hui

kausar o tasnim ki maujon ko sharmati hui

aina sa shahid-e-qudrat ko dikhlati hui

sang-e-rah se gaah bachti gaah takrati hui

chhedti ja is iraq-e-dil-nashin ke saaz ko

ai musafir dil samajhta hai tiri avaz ko

laila-e-shab kholti hai aa ke jab zulf-e-rasa

daman-e-dil khinchti hai absharon ki sada

vo khamoshi shaam ki jis par takallum ho fida

vo darakhton par tafakkur ka saman chhaya hua

kanpta phirta hai kya rang-e-shafaq kohsar par

khush-numa lagta hai ye ghaza tire rukhsar par

ai himala dastan us vaqt ki koi suna

maskan-e-aba-e-insan jab bana daman tira

kuchh bata us sidhi-sadhi zindagi ka majra

daagh jis par ghaza-e-rang-e-taklluf ka na tha

haan dikha de ai tasavvur phir vo subh o shaam tu

daud pichhe ki taraf ai gardish-e-ayyam tu