Ameer Minai
shamshir hai sinan hai kise duun kise na duun
ik jan-e-na-tavan hai kise duun kise na duun
mehman idhar huma hai udhar hai sag-e-habib
ik musht ustukhan hai kise duun kise na duun
darban hazar us ke yahan ek naqd-e-jan
maal is qadar kahan hai kise duun kise na duun
bulbul ko bhi hai phulon ki gulchin ko bhi talab
hairan baghban hai kise duun kise na duun
sab chahte hain us se jo vaada visal ka
kahta hai vo zaban hai kise duun kise na duun
shahzadi dukht-e-raz ke hazaron hain khvast-gar
chup murshid-e-mughan hai kise duun kise na duun
yaron ko bhi hai bose ki ghairon ko bhi talab
shashdar vo jan-e-jan hai kise duun kise na duun
dil mujh se mangte hain hazaron hasin ‘amir’
kitna ye armughan hai kise duun kise na duun
Leave a Reply