Allama Iqbal
kahte hain kabhi gosht na khata tha maarri
phal-phul pe karta tha hamesha guzar-auqat
ik dost ne bhuna hua titar use bheja
shayad ki vo shatir isi tarkib se ho maat
ye khvan-e-tar-o-taza maarri ne jo dekha
kahne laga vo sahib-e-ghufran-o-luzumat
ai murghak-e-bechara zara ye to bata tu
tera vo gunah kya tha ye hai jis ki mukafat?
afsos-sad-afsos ki shahin na bana tu
dekhe na tiri aankh ne fitrat ke isharat!
taqdir ke qaazi ka ye fatva hai azal se
hai jurm-e-zaifi ki saza marg-e-mufajat!
Leave a Reply