Ismail Merathi
salamat hai sar to sirhane bahut hain
mujhe dil-lagi ke thikane bahut hain
jo tashrif laao to hai kaun maane
magar khu-e-bad ko bahane bahut hain
asar kar gai nafs-e-rahzan ki dhamki
ki yaan mard kam aur zanane bahut hain
muattal nahin baithte shaghl vaale
shikar-afganon ko nishane bahut hain
karo dil ke virane ki kunj-kavi
dabe is khandar men khazane bahut hain
na ai shama ro ro ke mar shaam hi se
abhi tujh ko aansu bahane bahut hain
hua meri rudad par hukm akhir
ki mashhur aise fasane bahut hain
nahin rail ya taar barqi pe mauquf
chhupe qudrati kar-khane bahut hain
bache kyunki be-chara murgh-e-gurasna
ba-kasrat hain daam aur daane bahut hain
bas ik astana hai sajde ke qabil
zamana men go astane bahut hain
Leave a Reply