Poet
aabla khar-e-sar-e-mizhgan ne phoda saanp ka
seli-e-zulf-e-rasa ne kalla toda saanp
panja-e-dandan tiri kanghi ne moda saanp ka
kar ke gesu-e-kalai haath toda saanp ka
kudki si mere sar par ishq-e-gesu hai savar
chob ki badli banata tha main ghoda saanp ka
bar-e-firauni pe teri zulf agar bandhe kamar
azhdar-e-musa ke tausan par ho kuuda saanp ka
main huun vo ranjur-e-gesu aks agar mera pade
mohr-e-har-e-ustukhvan ban jaae phoda saanp ka
jab siyah botal se mai-rezi hui daur-e-firaq
main ye samjha zahr saaqi ne nichoda saanp ka
hai qadam us ka hava par paanv us ka khaak par
zulf ke mushki ko kab paata hai ghoda saanp ka
ashiq-e-zulf-e-siyah ko is tarah taazir do
saanp ki rassi banao aur koda saanp ka
zulf-e-kaj-raftar ki kab chaal chal sakta hai vo
aisi thokar khaae sar ban jaae roda saanp ka
ek din ho jaega raushan siyah-kari ka haal
donon baghlon men jaride hain ki joda saanp ka
janta huun main tire ras-o-zamb ko ai falak
mere dasne ke liye paala hai joda saanp ka
kya taajjub husn-e-janan se agar puchhe gazand
khaal men bichchhu ka joda zulfen joda saanp ka
saanp ke kaate ki lahr aae jo vasf-e-zulf men
‘bahr’ ne phir to koi mazmun na chhoda saanp ka
Leave a Reply