Ai Yas Jo Tu dil Mein Aai Sab Kuchh Hua Par Kuchh Bhi Na Hua

Poet

ai yaas jo tu dil men aai sab kuchh hua par kuchh bhi na hua

yaan ho gai khana-virani aur tera zarar kuchh bhi na hua

tha qasd ki un ko rokengi shab guzri inhin andeshon men

par hae-re nakami dil ki hangam-e-sahar kuchh bhi na hua

ehsan tira mujh par hota gar ruuh ko karta tan se juda

jab jaan bachi furqat ki shab ai dard-e-jigar kuchh bhi na hua

ai kaash vo baten ki hotin jo vahshat-e-dil ko kam kartin

itna jo baka to ai naseh mujh ko to asar kuchh bhi na hua

ab chahiye aisi fikr tujhe jis se ki nazare ki thahre

har vaqt ke rone se hasil ai dida-e-tar kuchh bhi na hua

dil aur jigar jaan aur ye sar ham shauq se laae paas tire

qismat ka gila ab kis se karen manzur-e-nazar kuchh bhi na hua

ya us se javab-e-khat laana ya qasid itna kah dena

bachne ka nahin bimar tira irshad agar kuchh bhi na hua

dhun vasl ki tujh par ghalib hai tu aish-o-tarab ka talib hai

kya lutf ‘haqir’ is ulfat ka betab agar kuchh bhi na hua