Bhartendu Harishchandra
ghazab hai surma de kar aaj vo bahar nikalte hain
abhi se kuchh dil-e-muztar par apne tiir chalte hain
zara dekho to ai ahl-e-sukhan zor-e-sanaat ko
nai bandish hai majnun nuur ke sanche men dhalte hain
bura ho ishq ka ye haal hai ab teri furqat men
ki chashm-e-khun-chakan se lakht-e-dil paiham nikalte hain
hila denge abhi ai sang-dil tere kaleje ko
hamari ah-e-atish-bar se patthar pighalte hain
tira ubhra hua siina jo ham ko yaad aata hai
to ai rashk-e-pari pahron kaf-e-afsos milte hain
kisi pahlu nahin chain aata hai ushshaq ko tere
tadapte hain fughan karte hain aur karvat badalte hain
‘rasa’ hajat nahin kuchh raushni ki kunj-e-marqad men
bajae-shama yaan dagh-e-jigar har vaqt jalte hain
Leave a Reply