Ali Sardar Jafri
shabon ki zulf ki ru-e-sahar ki khair manao
nigar-e-shams urus-e-qamar ki khair manao
sipah-e-dushman-e-insaniyat qarib aai
dayar-e-husn sar-e-rahguzar ki khair manao
abhi to auron ke divar-o-dar pe yurish thi
ab apne saya-e-divar-o-dar ki khair manao
chali hai atish-o-ahan ke dil se bad-e-sumum
chaman ke jalva-e-gul-ha-e-tar ki khair manao
guzar na jaae kahin bahr-o-bar se khuun ki dhaar
farogh-e-shabnam-o-ab-o-guhar ki khair manao
ye nafa-khoron ki danish-farosh duniya hai
mata-e-ilm ki jins-e-hunar ki khair manao
mire liye hai miri muflisi-o-napaki
tum apni paki-e-qalb-o-nazar ki khair manao
Leave a Reply