Ali Sardar Jafri
dil ki aag javani ke rukhsaron ko dahkae hai
bahe pasina mukhde par ya suraj pighla jaae hai
man ik nanha sa balak hai humak humak rah jaae hai
duur se mukh ka chand dikha kar kaun use lalchae hai
mai hai teri ankhon men aur mujh pe nasha sa taari hai
niind hai teri palkon men aur khvab mujhe dikhlae hai
tere qamat ki larzish se mauj-e-mai men larzish hai
teri nigah ki masti hi paimanon ko chhalkae hai
tera dard salamat hai to marne ki ummid nahin
laakh dukhi ho ye duniya rahne ki jagah ban jaae hai
Leave a Reply