Poet
na ada mujh se hua us sitam-ijad ka haq
meri gardan pe raha khanjar-e-bedad ka haq
naseho gar na sunun main miri qismat ka qusur
tum ne irshad kiya jo ki hai irshad ka haq
yaad to haq ki tujhe yaad hi par yaad rahi
yaar dushvar hai vo yaad jo hai yaad ka haq
apni tasvir pe sadqe tire sadqe kar use
isi surat se ada hovega bahzad ka haq
haq ko batil koi kis tarah se kah de ai but
kahin saani nahin us husn-e-khuda-dad ka haq
jan-kani pesha ho jis ka vo lahaq hai tera
tujh pe shirin hai na khusrav ka na farhad ka haq
bar-e-ehsan se nahin sar bhi utha sakta huun
mere sar par hi raha us mire jallad ka haq
sun ke kahta hai yahan kaun hai sunta mat sun
sunne vaala hi suna is miri fariyad ka haq
vahi insan hai ‘ehsan’ ki jise ilm hai kuchh
haq ye hai baap se afzun rahe ustad ka haq
Leave a Reply