Akhtar Shirani
vo kabhi mil jaaen to kya kijiye
raat din surat ko dekha kijiye
chandni raton men ik ik phuul ko
be-khudi kahti hai sajda kijiye
jo tamanna bar na aae umr bhar
umr bhar us ki tamanna kijiye
ishq ki ranginiyon men duub kar
chandni raton men roya kijiye
puchh baithe hain hamara haal vo
be-khudi tu hi bata kya kijiye
ham hi us ke ishq ke qabil na the
kyuun kisi zalim ka shikva kijiye
aap hi ne dard-e-dil bakhsha hamen
aap hi is ka mudava kijiye
kahte hain ‘akhtar’ vo sun kar mere sher
is tarah ham ko na rusva kijiye
Leave a Reply