Yasmeen Habeeb
vaqt bas rengta hai umr ke saath
taara taara gina hai umr ke saath
kitna asan sa taalluq tha
kitna mushkil hua hai umr ke saath
phir safar naam hai aziyyat ka
rasta hanpta hai umr ke saath
kis ki ankhon ko niind chubhti hai
kaun jaaga raha hai umr ke saath
jaane aram aaega kab tak
dard badhne laga hai umr ke saath
ik gunah tha chhupae rakkha tha
samne aa gaya hai umr ke saath
zindagi zindagi nahin lagti
koi dhoka hua hai umr ke saath
subh-e-kazib se sham-e-sadiq tak
ek mahshar bapa hai umr ke saath
kaisa chehra hai raat ki tafsil
kaun jal kar bujha hai umr ke saath
gard-e-mazi hai vasl ka hasil
qafila hijr ka hai umr ke saath
Leave a Reply