Aazadi Se Nindon Tak

Tanveer Anjum

zindagi ki chattanon se

sazaon ka samundar takrata hai

aur safed chattanen samundar ki kaali kar dene vaali taqat se be-khabar

khvabon ke ghurur se labrez hain

paani chattanon men raste banata rahta hai

aur aise men koi nahin janta

ham azadi ke jog men

tanhai ke kis kis jangal men bhatke hain

azadi ke libas ko apna badan samajh kar

vahshi sannaton ki aamad se be-khabar

ham kahan kahan bhatke hain

aur jab libas phat jaate hain

ham in chithdon ko apne be-libas tanhaiyon men

yuun chhupa lete hain

jaise zinda maan ki ankhen murda bachche ki akhiri didar ko chhupa leti hain

to aise men samundar sailab ho jaata hai

aur safed chattanen

sazaon men dafn

apne alava sab kuchh bhuul jaane par majbur ho jaati hain

ham sailab men na bahe jaane ka dukh liye

nindon tak aa jaate hain

aur ham chattanon se guzarne vaale paani ke raste band nahin kar sakte to

hans dete hain

aur nindon ki bhiik jama karte karte

vahshi sannaton ki aamad ke haul men

ham sona bhuul jaate hain