Syeda Shan E Meraj
hijr men tere tasavvur ka sahara hai bahut
raat andheri hi sahi phir bhi ujala hai bahut
maang kar meri ana ko nahin dariya bhi qubul
aur be-mang mayassar ho to qatra hai bahut
ye to sach hai ki shab-e-gham ko sanvara tum ne
chashm-e-tar ne bhi mira saath nibhaya hai bahut
baat karna to kuja us se taaruf bhi nahin
umr bhar jis ko har ik haal men socha hai bahut
jaane kyuun mujh se vo katra ke guzar jaata hai
jis ne khud mujh ko kabhi tuut ke chaha hai bahut
ham se fankar bhi is daur men kam hi honge
ham ne duniya se tire gham ko chhupaya hai bahut
vo kahin mujh se taghaful ka sabab puchh na le
shaan aaj us ne mujhe ghaur se dekha hai bahut
Leave a Reply