Syeda Nafis Bano Shama
vo jo milta tha kabhi mujh se baharon ki tarah
aaj chubhta hai nigahon men vo kharon ki tarah
vo bhi kya shakhs hai jo qasr-e-tasavvur men mujhe
rose arasta karta hai mazaron ki tarah
dubne hi nahin deta kabhi kashti meri
ab bhi vo samne rahta hai kinaron ki tarah
laakh mahtab miri ziist men aae lekin
darmiyan tujh ko bhi dekha hai sitaron ki tarah
us ki ankhon ne ajab sehr kiya hai ham par
rat-bhar phirte rahe bada-gusaron ki tarah
aap ki ankhon se kuchh aur pata chalta hai
aap dekha na karen ham ko nazaron ki tarah
kis ko malum chhupae hai vo khanjar kitne
vo jo zahir men mila karta hai yaron ki tarah
us ke chehre pe to narmi hai halavat hai bahut
‘shama’ lahja hai magar us ka shararon ki tarah
Leave a Reply