Shabnam Shakeel
baat ima-o-isharat se badhi aap hi aap
us ki qurbat men bahalne laga ji aap hi aap
taaza kaliyon ke tabassum ka sabab kya hoga
aaya karti hai javani men hansi aap hi aap
zard hathon pe mohabbat ki lahu rang-e-hina
vaqt aaya to rachi aur rachi aap hi aap
bas ki rakkha tha makan muddaton tum ne khali
is men bad-ruh koi basne lagi aap hi aap
raakh bante vahi chehra nahin dekha jaata
jis ke shoale ki kabhi dhuum machi aap hi aap
bint-e-havva kisi chehre se na dhoka khaae
kenchuli saanp badalta hai nai aap hi aap
kaash aisa bhi ho qimat na ada karni pade
aur mil jaae mujhe koi khushi aap hi aap
Leave a Reply