Sarwat Zehra
khali khali raston pe be-karan udasi hai
jism ke tamashe men ruuh pyasi pyasi hai
khvab aur tamanna ka kya hisab rakhna hai
khvahishen hain sadiyon ki umr to zara si hai
rah-o-rasm rakhne ke baad ham ne jaana hai
vo jo ashnai thi vo to na-shanasi hai
ham kisi nae din ka intizar karte hain
din purane suraj ka shaam baasi baasi hai
dekh kar tumhen koi kis tarah sambhal paae
sab havas jaage hain aisi bad-havasi hai
zakhm ke chhupane ko ham libas laae the
shahr bhar ka kahna hai ye to khun-libasi hai
Leave a Reply