Sara Shagufta
ham kis dukh se apne makan farokht karte hain
aur bhuuk ke liye chyunti-bhar aata kharidte hain
hamen band kamron men kyuun piro diya gaya hai
ek din ki umr vaale to abhi darvaza taak rahe hain
chaal lahu ki buund buund maang rahi hai
kisi ko churana ho to sab se pahle us ke qadam churao
tum chithde par baithe zaban pe phuul ho
aur avaz kor si kor
insan ka piyala samundar ke pyale se mitti nikalta hai
mitti ke saanp banata hai aur bhuuk palta hai
tinke jab shuaon ki pyaas na bujha sake to aag lagi
main ne aag ko dhoya aur dhuup ko sukhaya
suraj jo din ka siina jala raha tha
asmani rang se bhar diya
ab asman ki jagah kora kaghaz bichha diya gaya
log mausam se dhoka khane lage
phir ek aadmi ko tod kar main ne suraj banaya
logon ki poren kuen men bhar diin
aur asman ko dhaga kiya
kaenat ko nai karvat nasib hui
logon ne inton ke makan banana chhod diye
ankhon ki zaban-darazi rang laai
ab ek qadam pe din aur ek qadam pe raat hoti
haal jurat-e-guzishta hai
aa tere balon se shuaon ke ilzam utha luun
tum apni surat pahad ki khoh men ishara kar aae
kund havaon ka e’tiraf hai
safar edi pe khada hua
samundar aur mitti ne rona shurua kar diya hai
belche aur baazu ko do baazu tasavvur karna
suraj asman ke kone ke saath latka hua tha
aur apni shuaen apne jism ke gird lapet rakhi thiin
main ne khali kamre men muafi rakhi
aur mera siina dusron ke darvaze par dhadakta raha
Leave a Reply