Allama Iqbal
hadsa vo jo abhi parda-e-aflak men hai
aks us ka mire aina-e-idrak men hai
na sitare men hai ne gardish-e-aflak men hai
teri taqdir mire nala-e-bebak men hai
ya miri aah men hi koi sharar zinda nahin
ya zara nam abhi tere khas-o-khashak men hai
kya ajab meri nava-ha-e-sahar-gahi se
zinda ho jaae vo atish jo tiri khaak men hai
tod dalegi yahi khaak tilsim-e-shab-o-roz
garche uljhi hui taqdir ke pechak men hai
Leave a Reply