Akbar Allahabadi
hava-e-shab bhi hai ambar-afshan uruuj bhi hai mah-e-mubin ka
nisar hone ki do ijazat mahal nahin hai nahin nahin ka
agar ho zauq-e-sujud paida sitara ho auj par jabin ka
nishan-e-sajda zamin par ho to fakhr hai vo rukh-e-zamin ka
saba bhi us gul ke paas aai to mere dil ko hua ye khatka
koi shagufa na ye khilae payam laai na ho kahin ka
na mehr o mah par miri nazar hai na lala-o-gul ki kuchh khabar hai
farogh-e-dil ke liye hai kaafi tasavvur us ru-e-atishin ka
na ilm-e-fitrat men tum ho mahir na zauq-e-taat hai tum se zahir
ye be-usuli bahut buri hai tumhen na rakkhegi ye kahin ka
Leave a Reply