Poet
gharib aadmi ko thaat padshahi ka
ye pesh-khema hai zalim tiri tabahi ka
khadang-e-ah ko roke raha huun furqat men
khayal hai mujhe aflak ki tabahi ka
umiid kaise ho mahshar men surkh-rui ki
hamesha kaam kiya ho jo ru-siyahi ka
salam tak nahin lete kalam to kaisa
faqiri men bhi tabakhtur hai badshahi ka
shikast-o-fath ka zimma nahin dil-e-nadan
lade hazar men ye kaam hai sipahi ka
khizab karte hain duniya se jab gae guzre
shugun karte hain piiri men ru-siyahi ka
na asman ki inayat na mehrban vo shokh
na puchho haal gharibon ki be-panahi ka
safed balon pe kis vaste khizab lagaen
gaya zamana javani men ru-siyahi ka
khataen ho gaiin maadum haj se ai ‘parvin’
gavah khud hai khuda meri be-gunahi ka
Leave a Reply