Ahl-E-Gham Aao Zara Sair-E-Gulistan Kar Len

Parveen Fana Syed

ahl-e-gham aao zara sair-e-gulistan kar len

gar khizan hai to chalo shaghl-e-baharan kar len

phir to har samt andhera hi andhera hoga

pau phati hai to luti bazm charaghan kar len

dil ki viraniyan ankhon men udati hain ghubar

mil ke ro len to kuchh un ko bhi farozan kar len

qahqahon se to ghutan aur bhi badh jaegi

aao chup rah ke hi is dard ka darman kar len

shayad is tarah bagulon ka guzar mumkin ho

apne virane ko kuchh aur bhi viran kar len

ham jo zinda hain to sab kahte hain kyuun zinda hain

aao mar kar bhi masihaon ko hairan kar len