Baadal ke aur bahar ke rishtay ajeeb heiN
kaali ghataa ke dosh pe barfoN ka rakht hey
jitney zameeN pe behtey heiN daryaa, sabhi ka rukh
ik behar-e-bekinaar ki manzil ki simt hey
KhaaboN meiN aek bheegi hui khush-dili ke saath
milti hey aashnaa sey koi ajnabi si moaj
baadal bhaNwar ke haath sey letey heiN apna rizq
phir us ko baaNt’tey heiN ajab berukhi ke saath
jangal meiN, sehan-e-baagh meiN, shehroN meiN, dasht meiN
chashmoN meiN, aabshaar meiN, jheeloN ke tasht meiN
gaahey ye oss ban ke saNwartey heiN barg barg
gaahey kisi ki aaNkh meiN bhartey heiN is tarhaN
aaNsu ki aek boond meiN dajla deekhaai dey
aur doosrey hi pal meiN jo dekho to door tak
reyg-e-rawaan-e-dard ka sehraa dekhaai dey!
Baadal ke aur behar ke jitney heiN silsiley
mujh sey bhi teri aaNkh ke rishtey wohi to heiN!!
By
Amjad Islam Amjad