mohabbat ye terii bahaana bhii hai: Ibrahim Ashk

[Shahzada Saleem]

tere shahar meN ek divaana bhii hai
jo sab ke sitam ka nishaana bhii hai

baDaa silsilaa hai Khudaa se meraa
falak pe meraa aanaa jaanaa bhii hai

hai maqsad to apnii hii takmiil kaa
mohabbat yah terii bahaanaa bhii hai

ravaayat hai aadam se yah ishq kii
yah saudaa bohat hii puraanaa bhii hai

bhaTakte haiN aavaaraa galiyoN meN ham
kahiN aashiqoN kaa Thikaanaa bhii hai

musalsal safar meN hai apnii hayaat
yahaaN se kahiiN lauT jaanaa bhii hai

mile voh to kuchh haal-e-dil ham kaheN
bohat aaj mausam suhaanaa bhii hai

kahii hai Gazal hamne uske liye
ki yah ashk jis se chhupaanaa bhii hai

[Editor]

Very Nice...... Editor - Urdu Poetry Forum

[Shahzada Saleem]

BOHOT BOHOT SHUKRIYA JANAB

[hotkhan]

bahut khoob SS, nice sharing

[Shahzada Saleem]

donoN jahaaN terii mohabbat meN haar ke
vo jaa rahaa hai koii shab-e-Gam guzaar ke

viiraaN hai maikadaa, Khum-o-saaGar udaas haiN
tum kyaa gaye ki ruuTh gaye din bahaar ke

ek fursat-e-gunaah milii, vo bhii chaar din
dekhe haiN hamne hausle parvardigaar ke

dunyaa ne terii yaad se begaanaa kar diyaa
tujh se bhii dilfareb haiN Gam rozgaar ke

bhuule se muskraa to diye the vo aaj Faiz
mat puuchh valvale dil-e-naakarda-kaar ke

[Shahzada Saleem]

jo tez dauDte the, bohat jald thak gaye
ham dhiire dhiire chalte hue duur tak gaye

utran pahan ke shaah kii khush haiN musaahibiin
suuraj se bhiik maang ke zarre chamak gaye

yaaroN ne zaKhm-e-dil kaa mere yuuN kiyaa ilaaj
aaye thee Khuun poNchhne, rakh kar namak gaye

aaNkhoN ko intezaar meN parde pe TaaNk kar
chaukhaT se posTar kii tarah ham chipak gaye

vo shaaerii bhii hai ki nahiiN sochiye Kamaal
naam-e-Ghazal pe aap bohat kuchh to bik gaye

[Shahzada Saleem]

Aye moj-e-hawa,Ab tu hi bata,
Wo yar hamara kaisa hai?
Jo bhool gaya hum ko kab se,
Wo jaan se pyara kaisa hai ?
Kia us ko jeewan lamho mein,
Koi lamha mera baqi hai ?
Kia uski jaagti aankhon main,
Meri yaad se phaili udasi hai ?
Kia wo bhi meri tarah yun hi,
Shab bhar jaga kerta hai ?
Kia wo bhi saya-e-rehmat main,
Hamain RAB se manga karta hai ?
Agar aisa nahi to tu hi bata,
Hum yaad use Kion kertay hain ?
Wo humse bicher ker khush hai agar,
To hum pal pal kion marte hain ?

[Shahzada Saleem]

Kaisay kahon k apna bana lo mujhey,
Bahoun main apni sama lo mujhey,
Bin tumharay ek pal bhi kat-ta nahin,
Tum aa ker mujh se chura lo mujhey,
Zindagi to wo hai sang tumharay jo guzray,
Duniya k ghamoun se ab chura lo mujhey,
Mere sab se gehri Khuwahish ho puri,
Tum agar pas apnay bula lo mujhey,
Yeh kaisa nasha hai jo behka raha hai,
Tumhara hon main tu phir sanbhalo mujhey,
Najanay phir kaisay guzray gi Zindagani,
Agar apnay dil se kabhi tum nikalo mujhey.

[Shahzada Saleem]

Apni yaden, apni batain lay ker jana bhool gaya,
Janay wala jaldi main tha, mil ker jana bhool gaya,
Mur, murr ker dekha tha usnay jatay rastay main,
Jesay usnay kehna tha kuch, jo wo kehna bhol gaya,
Waqt-e-rukhsat meri ankhain ponch raha tha anchal se,
usko gham tha itna ziyadah, khud wo roona bhool gaya

[Shahzada Saleem]

jab bhii chaaheN ek nahiiN suurat banaa lete haiN log
ek chehre par kaii chehre sajaa lete haiN log

mil bhii lete haiN gale se apne matlab ke liye
aa paDe mushkil to nazreN bhii churaa lete haiN log

hai bajaa unkii shikaayat lekin iskaa kyaa ilaaj
bijliyaaN Khud apne gulshan par giraa lete haiN log

ho Khushii bhii unko haasil ye zaruuri to nahiiN
Gam chhupaane ke liye bhii muskuraa lete haiN log

ye bhii dekhaa hai ki jab aa jaaye Gairat ka muqaam
apnii suulii apne kaandhe par uThaa lete haiN log