[hotkhan]

nasiim-e-subah gulashan me.n gulo.n se khelatii hogii
kisii kii aaKhirii hichakii kisii kii dillagii hogii

tere qadamo.n pe sar hogaa qazaa sar pe kha.Dii hogii
phir us sajde kaa kyaa kahanaa anokhii ba.ndagii hogii

dikhaa duu.Ngaa sar-e-mahafil bataa duu.Ngaa sar-e-mahashar
vo mere dil me.n ho.nge aur duniyaa dekhatii hogii

tumhe.n daanistaa mahafil me.n jo dekhaa ho to mujarim huu.N
nazar aaKhir nazar hai be-iraadaa uTh ga_ii hogii

mazaa aa jaayegaa mahashar me.n phir sunane-sunaane kaa
zubaa.N hogii vahaa.N merii kahaanii aap kii hogii

sar-e-mahafil bataa duu.Ngaa sar-e-mahashar dikha duu.Ngaa
hamaare saath woh hoge ye duniyaa dekhatii hogii

yahii aalam rahaa pardaanashiino.n kaa to zaahir hai
Khudaa_ii aap se hogii na ham se ba.ndagii hogii

ta'ajjub kyaa lagii jo aag ai 'Seemab' siine me.n
hazaaro.n dil me. a.Ngaare bhare the lag ga_ii hogii