[hotkhan]

phir mujhe diidaa-e-tar yaad aayaa
dil jigar tashnaa-e-fariyaad aayaa

dam liyaa thaa na qayaamat ne hanoz
phir teraa vaqt-e-safar yaad aayaa

saadagii haaye tamannaa yaanii
phir wo naii_rang-e-nazar yaad aayaa

uzr-e-vaamaa.Ndagii ae hasrat-e-dil
naalaa karataa thaa jigar yaad aayaa

zindagii yuu.N bhii guzar hii jaatii
kyo.n teraa raah_guzar yaad aayaa

kyaa hii rizavaan se la.Daaii hogii
ghar teraa Khuld me.n gar yaad aayaa

aah wo jurrat-e-fariyaad kahaa.N
dil se ta.ng aake jigar yaad aayaa

phir tere kuuche ko jaata hai Khayaal
dil-e-Gum_gashtaa magar yaad aayaa

koii viiraanii-sii-viiraa.Nii hai
dasht ko dekh ke ghar yaad aayaa

mai.n ne majanuu.N pe la.Dakapan me.n 'Asad'
sang uThaayaa thaa ke sar yaad aayaa