Poet
de den abhi kare jo koi ḳhub-ru pasand
ham ko nahin pasand dil-e-arzu-pasand
manind-e-ashk ḳhaak men aḳhir mila diya
aa.i na asman ko miri aabru pasand
tum ne vahan raqib ko pahlu men di jagah
yaan rah gaya taḌap ke dil-e-arzu-pasand
ushshaq se vo puchhte hain tegh tol kar
hai zaḳhm-e-sar pasand ki zaḳhm-e-gulu pasand
qurban is ada ke vo kahte hain ai ‘nasim’
aaya hai ashiqon men hamen ek tu pasand
Leave a Reply